Let's say I'm a Call-agent

Eigentläch hani ja scho ewig lang mau öppis über mi Job wöuä schribä, wüu aui geng grad stutzä, we si erfahre, wasi im momänt so tue...
Oder besser gseit: ta ha... wüu promt a däm Tag woni mrs ändläch so richtig i Chopf gsetzt ha, mi hinter dä Blog z setzä, hani d Chündigung becho... so let's say, I HAVE BEEN a call-agent...

Di meiste Lüt hei ja gwüss nid grad z beste Biud vo so Telefon wo eim öppis VERCHOUFT/ UFGSCHWÄTZ/ ADRÄIT wird oder wärdä sött.. Ig bi mir durchuus bewusst, dass mi(ehemalig) Job eher i dä Beriich faut, wo vili vo denä Lüt, wo am anderä Ändi vom Telefon dermit konfrontiert wärdä, zimläch hässig cha mache.. u i mues o grad im Voruus sägä, dasi äuä mit däm Blog di augemein verbreiteti Iistellig däm gägänüber nid wirde chönnä/wöuä revidiere...

Das ganze faht eigentläch dadermit a, dasmä säch birä Gratis- Hotline mäudet u witervermittlet wird anes Callcenter bi sich ir Umgäbig. När het mä de mau d Personauchefin(wo nid ganz überaui Zwiifu erhabä isch)dran, wo eim e Termin fürnäs Vorstelligsgspräch git, wo eich nur rein pro Forma isch- wüu si eh dankbar si für jedä(ussert du hesch irgenwelchi gaaanz komischi Störigä, wi di einti woni vor Churzem ha müässä iischaffe)...

Item... ufaufau hetmä das Vorstelligsgspräch (äbä:pro forma, wüu mi Läbenslouf het si gloubs gar nid ersch wük agluegt..) u we si e guete Iidruck vo dir hei(..?) luegt mä fürnä Termin wägeme Schnuppertag...

Das widerum louft e so ab, dass mä ä Schuälig für irgendes (totau übertüürts) Produkt het, ahand vo drünä Bletter womä muäs "studiere" und mitere Verchoufsschuälig mitem CCM persönläch.. wüu i däm Call-Center hei aui so hyper-cooli Abchürzigä.. besagte CCM isch nämläch dr "Call-Center-Manager" u uf bärndütsch gseit eifach dr Scheff vo däm Ladä... (di obä erwähnti Personauchefin wäri übrigens d "PM")
Nach derä Schuälig- wo eim näbscht em sinnvouä AIDA-Prinzip o erklärt wird, dass d Lüt haut eifach Gschichtli WEI ghörä- darf mä säch när mitsamt HeadSet näbänä CCA(das wäri de äbä när z Ziel.. dr Call-Center-Agent) setzä u däm zuälosä, wi das so louft mit Telefoniärä... Da hockt mä när näbädran, lost haubwägs zuä u kluegt derbi no chli zum Fänschter us ufs schönä Schloss u dänkt säch DS ISCH JA VOU IIIISI...

Tja, när chunt aber dr Momänt, womä säuber ufd schwizer Bevöukerig losgla wird u plötzläch het mä au di wunderbarä Informationä über das pflanzlächä- ABSOLUT pflanzlächä- Produkt vergässä, u weiss nid mau me, wime heisst, we me sech doch sött vorsteuä, sobaud öpper abnimmt...
Aber mit dr Zyt leit sech de o das widr (sogar no während em Schnuppertag) und eventuell het me sogar GLück und macht dr eint oder ander Lucky-Punch u verchouft sogar öppis- was d Freicharte zurä Astellig isch- ke Angscht, mä wir do süsch gno!

Guet... Uf jedä Fau hani dert afa schaffe(drü Lucky-punches am Schnuppertag..;)) u ha mi sogar rächt schnäu dra gwöhnt.. Aber NATÜRLÄCH isches numä ä Übergangslösig gsi, wini immer überau betont ha- das hani de o no nachem dritte Monet immer no gseit...

Aber iz churz zu denä Fragä womer immer u immer wider si gsteut wordä...:

1. "ABER DERT SCHAFFE DOCH NUMÄ SIFFERS U ABSTÜRZ...?!?"

JA U NEI...

ig cha nid ganz e klari antwort druf gä... äs git äbä beides...
Oke, ehrläch gseit; es het Siffers, und ja, es het Abstürz... mini Motivation isch immer haubwägs gsi, dasi dä Job numä aus Übergangslösig mache, dasi nid druf agwiise bi.. aber es het äbä o diä Lüt, wo vo däm Job abhängig sy, wüu si nid mau e Lehr oder so öppis hei... Auerdings hets zum Bispiu o Huusfrouä, wo dert schaffe, wüu si säch d Arbeitszyte so chöi iiteilä, dass si denn chöi ga schaffe we ihri Kids ir Schueu si- auso durchus kei Siffers...d Müätere,nid d Ching! Es het aber o Zickänä, wo chöi Stuätäbissig si bis zum Abwinkä und vorauem äs huärä Gläschter (was das ageit si Mannä definitiv pflegeliächter...!) De wirdsch aglächlet u hingädürä stecke si dr z Mässer i Rüggä u lächlä de schlussändläch bi dirä Chündigung so süffisant, asu würdä si dr sä am liäbschtä no säuber unterschribe... Am Schluss isch das ä Stimmig gsi zum Ablöschä u e gwüssi Kollegin u ig (mit Abstand di zwöi Jüngstä im Team (19/21)) hei nis gfragt, öb mir ächt di einzigä "erwachsänä" Personä i däm Ruum si.. oder zMindscht di einzige, wo säch o dernä verhaute... Man bedenke: üsi Mitarbeiterinne si när eher zwüsch 30-55 y z'stuefe gsi!!!

U när gits no di anderä.. Diä, wo eim di 3 1/2-stündigi Schicht miteme Lächlä, eme Witz, ufmunternde Wort oder ere Umarmig versüässt hei... Diä, wo eim ab und zuä, wi früächer ir Schuäu, äs Briäfli zuä gschmugglet hei... Diä, wo eim zum Lache bracht hei, we eim doch nur no zum Grännä z' Muät wär gsi, wüu mä am haubi 12i geng no ke Verchouf het gha... Oer diä, wo über d' Trennwand hinwäg mit eim Schiffli-versänkä gspiut hei, wes de o gar z längwilig isch worde...
MERCI ÄMI, CRISLÄ U CONÄ!!! ♥

2. "ABER DAS ISCH DOCH ABARTIG LÄNGWILIG..!"

JA U NEI..

Wed nid verchoufsch, de DEFINITIV... abr wed verchoufsch u gueti Gspräch hesCH, wed überhoupts Gspräch hesch, de chas sogar vorcho, dases fägt...
wobii bi mir gägä Schluss me so chli d Angscht überwogä het, dasi verblödä...

3. "DA WIRDSCH DOCH DI GANZ ZYT NUMÄ AGMOTZET!!"

OOOH JA, UND DOCH O NEI...

ds wichtigste i däm Job isch(näbscht däm dasmä verchouft) dasmä ganz klar mues trennä u nüt darf persönläch nä.. was aber under gwüssä Umständ doch o cha schwirig si...

aus chlyses Bispiu es Gspräch zwüschä mir u Mister Dumpfbacke...:
Anina:
"..Roth vor Firma Blablabla in Thun"

Mister D.:
" heiter dr Stärn im Telefonbuäch nid gseh?! ä huärä Frächheit isch das!!"

Anina:
"excüse Herr D., dä hani nid gseh, tschudigung für d' Störig u nüt für unguet, i wünschä näch no ä schönä Tag"

Mister D.:
"nei, NEI! so eifach chömeter mr nid dervo! Weli Firma heiter gseit? (ohni d Antwort abzwarte witer..)THUN?! ä huärä Frächheit isch das, was erloubet dir näch eigentläch, was faut näch y mi so ga z belästige...(usw usf)"

Anina:
"äs tuet mr würkläch Leid Herr D., ig tuä öich grad sofort vo üsere Lischte striiche und entschuldige mi im Name vür ganze Firma für di Belästigung!"

Mister D.
"So eifach chömeter mir nid dervo Fröilein... NEI, das hättet dr wou gärn.. Wi heisst di Firma?! i füährä drum ä Blog woni so Belästigunge duä ufliste.. sonä Frächheit isch das!!! Vor Gricht gani, JAAA GENAU, vor Gricht schleipfi näch, sonä Belästigung das!"

(mittlerwilä ire Lutsterchi, dasi ds HeadSet ha abzoge u vor mir ufä Tisch gleit ha- unä IMMER no ghört ha!!!

Anina:
"Ja machet dir das Herr D.- we dr süsch nüt bessers z'tüä heit u dr nä wenigstens widr chli Fröid chlöit ha am Läbä... SCHÖNÄ TAG NO!"


jaa, das wär iz es Bispiu(wo säch tatsächläch so abgspiut het!!), wonis doch persönläch ha gno... ÄS GIT ABER DURCHUS O SEHR FRÜNDLÄCHI LÜT U ÄS CHÖI SEHR GUETÄ GSPRÄCH Z STAND CHO, wetti no so erwähnt ha!


ITEM... uf jedäfau het de o üses Büro mau ar Modernisierig müässä na gä und mir hei es Computersystem becho- vorhär heimer nämläch Liste gha u no vo Hand jedi Nummärä iitöggelet.......
Ds funktioniert e so, dasmä eich über Internettelefonie verbunde wird, übere eint Server wird gwäut u mä "hanget" ire Warteliste. Sobaud dr Computer öpper erreicht het, wird me witervermittlet u gliichzitig sött dr ander Server d'Adrässkartei ufstarte, damit mä gseht, wän mä am Telefon hätt.. das funktioniert aber leider nid immer ganz e so wis sött...

Da hockt mä so gmüätläch uf sim Stüähli, wartet ufnä Verbindig u ghört när plötzläch ds Ändi vomä Satz u es Chräschlä dürs Telefon u merkt
OOOPS,IZ WÄR ÖPPER AM TELEFON..
leiderleider isch dr PC z langsam, i ha nid ghört wär abgno het u di verfl... Adrässkartei het immer no nit ufgstartet... auso redet mä eifach mau druflos ohni ä Ahnig z ha, wän mä am Telefon het... Was zimläch piinläch cha si, we mä ar Frou Soundso ä Frag steut u mä när usäfindet, dasmä mit derä ihrem liächt verergerete Gatte am Telefon isch...

Aber z witzigste/piinlächstä/dämlächstä-was-o-immer isch mer passiert, woni ir region Bärn telefoniert ha...
Dr Pipston ertönt u i ghörä wi öpper abnimmt :
"SAHLI..?"
- u mir blibe grad d Wort im Haus steckä.. ds wär iz widr sonä Situation woni mi Namä vergässä ha u bangend ufd Adrässkartei gwartet ha, ir Hoffnig, dass säch mini Ahnig nid aus richtig usästeut...
"EHM...ÖÖH...ROTH VO THUN, EHM, FIRMA BLABLABLA... MHHH, ÄS ISCH DRUM SO...HMH"
u när blibä mr d Wort sowiso grad im Haus steckä..: D Adrässkartei het doch no ufgstartet u SI ISCHES... Sahli.. EVA SAHLI... diä Frou wo uf mirä Top-Ten-Liste vo dä "LÜT WONI NIÄ WOT ALÜTÄ" definitiv uf Rang eis steit, wes sä würd gä...
jaah, i ha niä so wenig "Rotä Fadä" i mim Gspräch gha, wi bi däm Telefonat- u was mi am meiste verwirrt het...: SI ISCH ENORM FRÜNDLÄCH GSI!!!
aber i gloube we si mi im Nachhinein psychologisch würd analysiere, würdi e zimlächä Knacks ha.. ;)

i sägä numä: ZUM GLÜCK HET SI NID TSCHEGGET WÄRI BI

und

ADIEU ADIEU

Kommentare

  1. herrlich!
    me müesst en film mache über de alltag vomne CCM. :)
    glg dani

    AntwortenLöschen
  2. Hei min liäbste ehemalig CCA!
    eifach der Hammer... ich han din nöiste Blog zum Zmörgele duregläse und immer wider mega müesse Smile... d PM wo nid über alli Zwiifel erhabe isch.. XD

    AntwortenLöschen

Kommentar veröffentlichen

Beliebte Posts aus diesem Blog

Update

I'm useless when I'm happy

Weite